(ហ្សឺណែវ)៖ មន្ត្រីការទូតជាន់ខ្ពស់កូរ៉េខាងជើងម្នាក់បានព្រមានថា ប្រទេសរបស់លោកបានត្រៀមខ្លួនជាស្រេច ក្នុងការបញ្ជូនកញ្ចប់កាដូរបន្ថែមទៀតទៅកាន់សហរដ្ឋអាមេរិក ខណៈមហាអំណាចផុតលេខមួយនេះ កំពុងប្រមូលផ្ដុំកម្លាំងដាក់ទណ្ឌកម្មយ៉ាងធ្ងន់ធ្ងរបំផុត ប្រឆាំងនឹងរបបដឹកនាំ លោក គីម ជុងអ៊ុន សម្រាប់ការធ្វើតេស្ដបំផ្ទុះក្បាលគ្រាប់នុយក្លេអ៊ែរជាលើកទី០៦ កាលពីថ្ងៃអាទិត្យ។ នេះបើតាមការចេញផ្សាយដោយ ទីភ្នាក់ងារសារព័ត៌មាន Reuters នៅព្រឹកថ្ងៃពុធ ទី០៦ ខែកញ្ញា ឆ្នាំ២០១៧។
ថ្លែងទៅកាន់សន្និសីទលុបបំបាត់អាវុធ អគ្គរដ្ឋទូតកូរ៉េខាងជើងប្រចំា UN លោក ហាន តែសុង (Han Tae Song) បានទទួលស្គាល់ថា កូរ៉េខាងជើងបានតេស្ដបំផ្ទុះក្បាលគ្រាប់នុយក្លេអ៊ែរជាលើកទី០៦ ដោយជោគជ័យ។ លោក Han បានលើកឡើងយ៉ាងដូច្នេះថា «វិធានការការពារខ្លួននាពេលថ្មីៗនេះនៃប្រទេសរបស់ខ្ញុំ គឺជាកញ្ចប់កាដូមួយផ្ញើជូនសហរដ្ឋអាមេរិក ហើយសហរដ្ឋអាមេរិកអាចនឹង ទទួលបានកញ្ចប់កាដូនេះបន្ថែមទៀត... ដរាបណានៅតែបន្តធ្វើសកម្មភាពបង្ករឿង និងប៉ុនប៉ងដាក់សម្ពាធលើកូរ៉េខាងជើង»។
គួរបញ្ជាក់ថា កាលពីថ្ងៃចន្ទអគ្គរដ្ឋទូតអាមេរិកប្រចាំ UN លោកស្រី នីកគី ហាឡេយ (Nikki Haley( បានចោទប្រកាន់មេដឹកនាំកូរ៉េខាងជើង លោក គីម ជុងអ៊ុន កំពុងចង់ធ្វើសង្រ្គាមជាមួយការធ្វើតេស្ដមីស៊ីល និងអាវុធនុយក្លេអ៊ែរជាបន្តបន្ទាប់ ព្រមទំាងបានបានជំរុញឱ្យក្រុមប្រឹក្សាសន្តិសុខ ដាក់ទណ្ឌកម្មឱ្យបានខ្លាំងក្លាបំផុត ប្រឆាំងនឹងទីក្រុងព្យុងយ៉ាងផងដែរ៕
![logoblog](https://3.bp.blogspot.com/-h2g5wrjCTDw/Wz3E6ocavYI/AAAAAAAABH8/nOqtyDL2VnEF_HmhZyjlu59zWRS8t7ZNwCLcBGAs/s1600/blogger.png)