ភ្នំពេញ៖ មួយប្រាវក្រោយចូលហង្សមាស ឃើញថា តារាចម្រៀងលំដាប់កំពូល ខេមរៈ សិរីមន្ត សម្រុកងាកមកបង្ហាញសកម្មភាពជាមួយ ឱក សុគន្ធកញ្ញា ខ្លាំងរហូតផ្ទុះការទាក់ទាញ។ យ៉ាងណាថ្មីៗនេះ មានតម្រុយថា សិរីមន្ត ក៏មានគម្រោងសាងអនាគតថ្មីជាមួយអ្នកមេម៉ាយស្រីស្រស់ ពេជ្រ សោភា ផងដែរ។
បន្ទាប់ពីទទួលបានការគាំទ្រខ្លាំង នូវបទចម្រៀង និងការសម្តែងរួមរវាង ខេមរៈ សិរីមន្ត និងដៃគូចាស់ ឱក សុគន្ធកញ្ញា នោះ ពេលនេះគេទទួលដំណឹងថ្មីថា តារាប្រុសរូបនេះ ក៏នឹងចាប់ដៃគូច្រៀងជាលើកដំបូងជាមួយនឹងតារាចម្រៀងស្រី ពេជ្រ សោភា ផងដែរ។
តារាចម្រៀងចំណូលថ្មីរបស់ផលិតកម្ម ហង្សមាស លោក ខេមរៈ សិរីមន្ត បានចាប់ដៃគូសម្តែងក្នុងបទចម្រៀង២បទ ជាមួយ ឱក សុគន្ធកញ្ញា គឺ “ស្ទឹងត្រែងបងអើយ” និងបទ “អស់សិទ្ធិថែ តែនៅបារម្ភ” ដែលទទួលបានការគាំទ្រខ្លាំងពីមហាជន។ កាន់តែប្លែក ខេរៈ សិរីមន្ត នឹងចាប់ដៃគូសម្តែង និងច្រៀងនូវបទចម្រៀងមួយចំនួនជាមួយ ពេជ្រ សោភា មុនពេលចាកចេញទៅអាមេរិក។
ការចាប់ដៃគូថ្មីនេះ ត្រូវបានគេជឿជាក់ថា នឹងធ្វើឲ្យអ្នកគាំទ្រពួកគេមានអារម្មណ៍ប្លែកជាមួយនឹងបទចម្រៀងថ្មី ដែលសម្រិតសម្រាំងសម្រាប់តារាចម្រៀងទាំងពីរដួង។
បើតាមប្រភពបញ្ជាក់ថា ពេជ្រ សោភា ដែលផ្តើមផ្លាស់ដៃគូច្រៀងជាមួយ G-Devith មកច្រៀងជាមួយតារាចម្រៀងសាច់ដុំធំ Step ហាក់មិនសូវមានសន្ទុះគាំទ្រខ្លាំង ប៉ុន្តែគេរំពឹងថា តារាចម្រៀងរូបនេះ អាចហក់ស្ទុះខ្លាំងឡើងវិញ នៅពេលជួបដៃគូថ្មី ហើយដែលជាតារាចម្រៀងលំដាប់ជួរមុខផងដែរនោះ។
តារាចម្រៀង ពេជ្រ សោភា ស្នើមិនបញ្ជាក់ជុំវិញការលើកឡើងអំពីចាប់ដៃគូថ្មី ប៉ុន្តែនាងលើកឡើងថា នាងនឹងធ្វើទៅតាមការកំណត់របស់ក្រុមហ៊ុន បើក្រុមហ៊ុនយល់ថា ល្អ ហើយនាងយល់ថា អាចជារឿងល្អ ប្រសិនបើការលើកឡើងខាងលើ អាចក្លាយជាការពិត៕
ប្រភព៖ campost.news
![logoblog](https://3.bp.blogspot.com/-h2g5wrjCTDw/Wz3E6ocavYI/AAAAAAAABH8/nOqtyDL2VnEF_HmhZyjlu59zWRS8t7ZNwCLcBGAs/s1600/blogger.png)